నేడు అంతర్జాతీయ పొదుపు దినోత్సవం

నేడు అంతర్జాతీయ పొదుపు దినోత్సవం 

దీన్ని 'ఇంటర్నేషనల్ డే ఆఫ్ సేవింగ్స్'గా ప్రపంచ దేశాలు గుర్తించాయి. పొదుపు అవసరాన్ని చాటి చెప్పేందుకు, సేవింగ్స్‌ను ప్రోత్సహించడానికి ఈ రోజు అవగాహన కార్యక్రమాలు నిర్వహిస్తారు.

సాధారణ వాడుకలో పొదుపు అంటే తమ ఆదాయంలో డబ్బును ఖర్చు పెట్టకుండా అట్టేపెట్టుకోవడం. 

ఆర్ధిక శాస్త్రం పరిభాషలో ఆదాయంలో వినియోగం చేయగా మిగిలిందే పొదుపు. మరింత విస్తృతమైన అర్ధంలో "పొదుపు" అంటే ఖర్చును తగ్గించుకోవడం.

భవిష్యత్తు అవసరాలు, వ్యయాల కోసం పక్కన పెట్టే మొత్తమే పొదుపు. ఇది సాధారణంగా అత్యవసరాలు, ఆపదల కాలంలో చేతికందుతుంది. మరో మాటలో చెప్పాలంటే అవసరమైనప్పుడు అతిత్వరగా చేతికందే మొత్తాలే పొదుపు. డిపాజిట్లు, నగదు, నగదు సమానమైన సాధనాలు ఈ కోవలోకి వస్తాయి.

మదుపు

వివిధ ఆర్థిక సాధనాలు, అసెట్లలో దీర్ఘకాలంలో సంపదను సృష్టించడానికి చేసేదే మదుపు. ఇవి సంపదను సృష్టించడంతోపాటు ఆదాయాలను కూడా ఇస్తాయి. ఈ కోవలోకి షేర్లు, రియల్‌ ఎస్టేట్‌, బంగారం, మ్యూచువల్‌ ఫండ్లు, బాండ్లు, ఇతర సాధనాలు వస్తాయి. వీటిలో రిస్క్‌ ఎక్కువ. అలాగే రాబడీ అధికమే. స్వల్ప, మధ్య, దీర్ఘకాలాలకు అనుగుణంగా మదుపు చేయవచ్చు.

నేటి పొదుపు.. రేపటి మదుపు..

ఆ తరంలో..ఈ తరంలో..

నీకైనా..నాకైనా..ఎవరికైనా

ఇదే ఓ వేదమంత్రం. మనకి  బ్రతికే సూత్రం..!

పొదుపంటే సొమ్ము మాత్రమే కాదు..

వనరులు.. మొక్కలు అడవులు మొ. 

నేటి మొక్క.. మరునాటికి చెట్టు..

మరో నాటికి మహావృక్షం!

మనకి పెద్దలు తరచు చెబుతూ ఉంటారు  

మన చిన్నతనం లో లక్ష్మీ నివాసం సినిమాలో ఒక పాట ఉండేది అది ఇప్పటికీ నాకు గుర్తు 

ధనమేరా అన్నిటికీ మూలం

ఆ ధనము విలువ తెలుసుకొనుట మానవధర్మం

కొండలైన కరగిపోవు కూర్చుని తింటే..

కూలిపోవు కాపురాలు ఇది తెలియకుంటే..  అంటాడు ఆరుద్ర. 

ఈ మాటలు  బాగుంటాయి వింటే..

ఆచరణే కష్టం.. 

కానీ క్రమశిక్షణ గా కలిగి మెలిగితే నే జీవనం .

ఆపై నీ ఇష్టం!

ఆకలి కడుపు, ఖాళీ జేబు, విరిగిన మనసు నేర్పినన్ని పాఠాలు ఎవరూ నేర్పలేరు' అంటారు. ఆకలి కడుపు జీవితంలో ఆహారం విలువను తెలియజేస్తే... ఖాళీ జేబు చేతిలో చిల్లిగవ్వ లేని సమయంలో పొదుపు చేయలేకపోయామే అన్న వేదనను మిగుల్చుతుంది. 'బూంద్‌ బూంద్‌ బనేగా సముందర్‌, పైసా పైసా జమాతో రుపయా హోయేగా' అనేది హిందీలో ఒక సామెత. ఒక్కొక్క బిందువు కలిస్తేనే మహాసముద్రం... పైసా పైసా కలిస్తేనే రూపాయి అవుతుందని దాని అర్థం. జీవితమనే బండిని సాఫీగా నడిపేందుకు అవసరమైన ఇంధనమే 'ధనం'. ఆదాయానికి మించి ఖర్చు చేయకుండా, రేపటి ఆనందమయ జీవితం కోసం...భవిష్యత్తు అవసరాల కోసం పక్కన పెట్టే చిన్నచిన్న మొత్తాలే పొదుపు. ఇవన్నీ జీవితంలో పొదుపు ఎంత ముఖ్యమో...తెలియజెప్పే సూత్రాలు. రూపాయి అంటుందిట- 'నన్ను వంద వరకూ పెంచు' తర్వాత నిన్ను నేను పెంచుతా' అని. అదే రూపాయిని చిల్లరగా మార్చితే చెల్లాచెదురవుతాయి. అదే చిల్లరను ఒక దగ్గర జమ చేస్తూపోతే ధన సమూహంగా మారుతుంది. అందుకే పొదుపు...భవిష్యత్తు నిర్మాణానికి తొలిమెట్టు.

'చక్రవర్తికి వీధి బిచ్చగత్తెకి/ బంధువవుతానని అంది మనీ మనీ/ అమ్మ చుట్టము కాదు అయ్య చుట్టము కాదు/ ఐనా అన్ని అంది మనీ మనీ/ పచ్చనోటుతో లైఫ్‌ లక్ష లింకులు పెట్టుకుందని/ అంది మనీ మనీ'   . 

'పొదుపు తెలిసిన గృహిణి కాపురం పచ్చని సంసారమే' అంటారు పెద్దలు. ఇంటి అవసరాల కోసం వచ్చే ఆదాయాన్ని బట్టి బడ్జెట్‌ తయారుచేసుకోవాలి. పొదుపు కోసం కొంత మిగుల్చుకోవాలి. ఈ అలవాటు ప్రారంభంలో కొంత కష్టమనిపించినా...తినగ తినగ వేము తీయనుండు అన్నట్టుగా తర్వాత్తర్వాత సులభమవుతుంది. 'ఇదమే వహి పాండిత్యం, ఇదమే వహి శూరత, ఇదమే వహి వైదగ్థ్యం, అదాదల్ప తరోవ్యయః’ అన్నారు మన పెద్దలు. . ఆదాయం కన్నా చాలా తక్కువ ఖర్చుపెట్టడమే..కానీ అది ఈ రోజుల్లో అయ్యే పని కాదని అందరికీ తెలుసు . 

కుటుంబాలకే కాదు...ఇది పాలకులు, ప్రభుత్వాలకు కూడా వర్తిస్తుంది. ప్రజల సొమ్మును, ప్రకతి వనరులను కార్పొరేట్లకు దోచిపెడుతూ...లక్షల కోట్ల అప్పులతో ప్రభుత్వాలను నడుపుతున్నారు. సంస్కరణల పేరుతో ప్రజల ముక్కుపిండి వసూలు చేస్తూ...కార్పొరేట్లకు మాత్రం కోట్లాది రూపాయల రాయితీలిస్తున్నారు. ఈ పరిస్థితుల్లో...అరకొర ఆదాయాలతో బతకడానికే ఆపసోపాలు పడుతుంటే...పొదుపు ఎలా చేయాలి? అనేది పెద్ద ప్రశ్నగా మారింది. నయా ఉదారవాద ఆర్థిక విధానాల పుణ్యమాని... ప్రపంచంలో వినిమయదారీ సంస్కతి విపరీతంగా పెరిగింది. చేతిలో పైసా లేకపోయినా, మధ్యతరగతి జీవితాలను ఆశల పల్లకిలో విహరింపజేస్తూ...క్రెడిట్‌ కార్డులు, ఇఎంఐ ల రూపంలో వున్నదంతా ఊడ్చేస్తున్నారు.  పొదుపు అలవాటుని ప్రజల్లో అవగాహనా పెంచాలి. 

కానీ ఇప్పుడు ఉన్న పరిస్థితి  ఎలా ఉందంటే 

మనం చేస్తే పొదుపు అది ఇంటికి మేలు..

కాని..అదుపు లేని.. పొదుపు ఎరుగని సర్కార్ల దుబారా.. 

ఈ పంపిణీల హంగామా.. అప్పుల పాలు..అదెంత భారం ఈ దుబారా..

అందుకోడానికి ఎందుకంత గాభరా..?

ఈ స్కీములు.. పెద్ద స్కాములు..

సంక్షేమం కాదది..సంక్షామం!

అన్నట్టు..అతి పొదుపు.. అదీ మరీ ముప్పే..

నువ్వు తినడం మాని.. తగిన బట్ట కట్టక..

జీవితాన్ని అనుభవించక.. బ్రతికే బ్రతుకు ఎడారి..

అప్పుడు నీ పేరు పిసినారి..!  అవసరాన్ని 

మించిన పొదుపు.. దెబ్బతినే గరిమనాభి...

నీ మరోపేరు లోభి..!  ఇతరుల పొట్ట కొట్టి..

నీ పొట్ట కట్టి కూడబెడితే ఆస్తి..

సమాజానికి నీ వల్ల ప్రయోజనం నాస్తి..

చెప్పేయి ఆ పద్ధతికి స్వస్తి..

సంపాదించు..ఆస్వాదించు..ఆస్తి పెంచు..

అవసరానికి మించి ఉంటే కాస్త పంచు..! 

చివరిగా  పొదుపు ప్రాముఖ్యతను ప్రభత్వం అందరిలోనూ అవగాహనా పెంచాలి .

మారుతున్న పరిస్థితులు, విజృంభిస్తోన్న మహమ్మారి నేపథ్యంలో ఈ రోజు వెనుక ఉన్న ఆలోచన, ఉద్దేశాలను ప్రజలు గుర్తించాలి.   ఆర్థిక వనరులు (ఫైనాన్షియల్ రిసోర్సెస్) ఎల్లప్పుడూ సమృద్ధిగా ఉంచాలి . దీన్ని దృష్టిలో పెట్టుకొని డబ్బు ఆదా చేయడంతో పాటు పొదుపుపై పూర్తిస్థాయిలో అవగాహన పెంచుకోవాలి. ప్రభుత్వాలు ప్రత్యేక కార్యక్రమాలు నిర్వహిస్తూ ప్రజలకు పొదుపు విలువ చాటి చెప్పాలి. డబ్బు ఆదా చేయడం ప్రాముఖ్యత గురించి పాఠశాలల్లో ప్రచారం చేయాలి. చిన్న వయస్సులోనే పిల్లలకు డబ్బు దాచడం గురించి నేర్పితే, ఆ అలవాటు పెద్దయ్యాక వారికి ఎంతగానో ఉపయోగపడుతుందని మా అభిప్రాయం అనవసరమైన ఖర్చును తగ్గించుకొని, రేపటికోసం కొంత దాచాలన్నది పెద్దలు చెప్పే ఆర్థిక సూత్రం. ఈ సూత్రంపైనే కుటుంబ భవిష్యత్తయినా, దేశ భవిష్యత్తయినా ఆధారపడి వుంటుంది.